Ish-ministri i Punëve të Jashtme, Skënder Hyseni ka thënë se kryeministri, Albin Kurti nuk e ka vazhduar dialogun ku ka qenë më herët dhe sipas tij kryeministri mashtron vazhdimisht në opinion. Madje Hyseni ka thënë se Kurti është një manipulues i shkëlqyeshëm.
“Kurti e ka bërë pikërisht të kundërtën, ai nuk e ka vazhduar dialogun aty ku kemi lënë ne, po flasim për marrëveshje, ai u kthy ka fol për targat ka fol për rrymë. Kurti e ka bërë të kundërtën dhe mua nuk më lë përshtypje çka ka thënë Kurti, sepse Kurti mashtron vazhdimisht në opinion, është një manipulues i shkëlqyeshëm dhe unë ja jap dorën për atë punë, sepse është inteligjent, d.m.th. di me manipulu masën, di madje edhe të pavërtetën me shitë si të vërtetë”, u shpreh Hyseni.
Sipas Hysenit, njohja nga Serbia do të vijë me ose pa dëshirën e saj, por do të vonohet faji i kryeministrit Kurti.
“Kurti, sot e ka një shancë ideale që ta shtyjë përpara planin franko-gjerman dhe ta nxjerrë më të mirën nga ajo si një hap shumë i rëndësishëm drejt njohjes. Njohja do të vijë nga Serbia, deshti s’deshti Serbia do të vijë. Por, tani do të vonohet faji i Kurtit, për fajin e gjendjes në veri ajo e ka kthyer situatën në pikën zero”, deklaroi Hyseni.
Se pse Kurti nuk u takua me Bliken, ai thotë se kryeministri ka lënë një shije të keqe dhe për këtë ka bllokadë nga Administrata Amerikane.
“Unë po shpresoj të jetë punë agjendash, por ka lënë shije të keqe dhe ashiqare e ka një bllokadë te Administrata Amerikane karshi përfaqësuesve të Qeverisë dhe institucioneve të Kosovës. Kjo është evidente dhe vetëm i verbëri nuk e sheh. Nuk është vështirë që kjo të konstatohet, duhet të shqetësohemi dhe duhet të bëjmë analizë me themel se pse ka ardhur deri këtu, cilët janë shkaktarët që kanë ardhur deri këtu”, ka thënë ai në emisionin “Info Nata” në Tëvë1.
Për gjashtë kushtet të cilat i ka vendosur kryeministri Kurti për asociacionin, ai i quan qesharake, sepse sipas tij, pesë prej tyre janë në tavolinë të bisedimeve.
“Besoj që nuk kanë çare pa e themelua Asociacionin. Unë gjashtë kushtet e Kurtit i kam quajtur qesharake, sepse pesë prej atyre kushteve janë në tavolinë të bisedimeve, nuk ka nevojë Kurti t’i përcaktoj, i kemi përcaktuar ne herët edhe zoti Thaçi edhe zoti Mustafa edhe zoti Hoti edhe unë gjatë dialogut. Vetëm një kusht nuk ka qenë aty, ai i grumbullimit të armëve, dhe ky është kusht qesharak. Ky është me të ardh keq që ke një ministër të tillë, sepse ky ia jep të drejtën Beogradit të vendos a do t’i dorëzojnë qytetarët e Kosovës armët ilegale a po jo. Ajo është çështje e ligjit është obligim i kryeministrit që t’i mbledh të gjitha armët që nuk kanë leje për posedim”, është shprehur ai.
