Kryetari i Gjilanit, Alban Hyseni ka thënë se edhe kjo komunë, ashtu si Prishtina po përballet me problemin e buxhetit i cili nuk është miratuar në asamble.
Por, ai ka thënë se ata kanë menaxhuar në një mënyrë tjetër dhe se nuk kanë hyrë në obligime pa mbulesë financiare.
“Edhe Gjilani, njësoj si kryeqyteti, po përballet me problemin e buxhetit të pamiratuar, por mënyra jonë e menaxhimit ka qenë krejt tjetër. Ne kemi respektuar plotësisht legjislacionin dhe nuk kemi hyrë në obligime pa mbulesë financiare. Mungesa e buxhetit të miratuar dhe operimi me 1/12 e buxhetit të vitit paraprak ka qenë dhe vazhdon të jetë mjaft sfidues. Megjithatë, shumë shpejt do të thërrasim seancën konstitutive dhe do të votojmë edhe bartjen e mjeteve vetanake për t’i mbuluar obligimet ekzistuese”, ka shkruar Hyseni.
Në Prishtinë që nga e hëna është pezulluar qarkullimi i autobusëve të trafikut për shkak të krizës financiare.
Kryetari i kryeqytetit, Përparim Rama ka paralajmëruar se shumë shërbime do të pezullohen në mungesë të buxhetit, për të cilën gjë ai ka fajësuar nivelin qendror.
Ndërsa, nga Ministria e Financave kanë thënë se fajet i ka Komuna e Prishtinës që nuk ka miratuar me kohë buxhetin për vitin 2026. teve1.info/
