Deputetja nga radhët e Partisë Demokratike të Kosovës, Eliza Hoxha në seancën e Kuvendit ka komentuar miratimin e Deklaratës për të zhdukurit gjatë luftës së fundit në Kosovë.
E me këtë Deklaratë deputeja e PDK-së, ka thënë se rrëfimi i familjarëve të personave të zhdukur në luftë është rrokullisur, e dhimbja e tyre është përmbysur, raporton teve1.info
“E di që shumë nga ju jeni ndjerë të turbulluar nga shkelja e trupave dhe vijave që vizojnë në mungesën e trupave të pagjetur por uroj që i keni lexuar edhe ato fragmente të shkurtra që vijnë nga muret për ndjenjën e familjarëve që janë në pritje”, deklaroi Hoxha.
“Më dy maj në Bruksel rrëfimi I tyre është rrokullisur, dhimbja e tyre është përmbysur”, shtoi ajo.
Tutje, Hoxha ka thënë se kryeministri i Kosovës, Albin Kurti ka shpikur një term, që nuk ekziston në Konventat Ndërkombëtare të Organizatës së Kombeve të Bashkuara, e sipas saj, kjo do të thotë se Serbia nuk e ka asnjë obligim juridik me kategorinë e të pagjeturve në Kosovë.
“Kryeministri i Kosovës, ka shpikur një term të ri i cili nuk ekziston në Konventat Ndërkombëtare të Organizatës së Kombeve të Bashkuara, Konventën për mbrojtjen e personave të zhdukur me dhunë, e që nuk njihet as si kategori juridike, e për ta thjeshtësuar, asnjë obligim juridik Serbia nuk e ka në kuptimin e reparacionit e çështjeve tjera që lidhen me kategorinë e të pagjeturëve në Kosovë”, u shpreh Hoxha.
Madje, Eliza Hoxha, ka lëshuar një këngë në telefonin e saj gjatë seancës së sotme, që është e shkruar për persona të pagjetur.
Ndër të tjerash, deputetja e PDK-së tha se sot do të dëshironte që në sallën e Kuvendit të Kosovës, të ishte Kurti e të kërkonte falje, sipas saj për mashtrimet që i’a ka bërë komunitetit në Kosovë dhe familjarëve të të pagjeturve./teve1.info
