Ambasadori amerikan në Kosovë, Jeffrey Hovenier, ka thënë se Shtetet e Bashkuara të Amerikës dhe anëtarët e tjerë të bashkësisë ndërkombëtare po përballen me disa sfida me qeverinë aktuale të Kosovës për shkak të disa vendimeve të Qeverisë Kurti .
Sipas Hovenier, këto vendime kanë ndikuar në kualitetin e marrëdhënieve Kosovë – SHBA, mirëpo Qeveria amerikane shpreson se Qeveria e Kosovës do t’i kthehet angazhimit konstruktiv me SHBA-në dhe partnerët tjerë ndërkombëtarë të Kosovës”
“Shumë prej jush keni parë raportin në media për dallimet e ShBA-së dhe anëtarëve të tjerë të bashkësisë ndërkombëtare me Qeverinë e Kosovës për disa veprime që janë ndërmarrë nga qeveria aktuale e kryeministrit Kurti. Po përballemi me disa sfida me qeverinë e tanishme të Kosovës të cilat kanë ndikuar në cilësinë e partneritetit tonë. Ashtu siç zëdhënësi i Departamentit të Shtetit më herët, Qeveria amerikane shpreson se Qeveria e Kosovës do t’i kthehet angazhimit të ngushtë dhe konstruktiv me SHBA-në, BE-në, NATO-n dhe partnerët tjerë ndërkombëtarë të Kosovës”, ka thënë Hovenier.
Tutje ambasadori, është shprehur se pavarësisht se bashkëpunimi në disa fusha me Qeverinë aktuale të Kosovës mbetet më pak pozitiv se që kishin shpresuar, përkushtimi i SHBA-së ndaj popullit të Kosovës mbetet po aq i fortë dhe i hekurt siç ka qenë gjithmonë dhe për këtë është dëshmi marrëveshja e nënshkruar sot.
“Por edhe pse disa fusha të bashkëpunimit me qeverinë e tanishme të Kosovës mbesin më pak pozitive se që do të kishim shpresuar, përkushtimi i Shteteve të Bashkuara të Amerikës ndaj popullit të Kosovës mbetet po aq i fortë e i hekurt si gjithmonë.Ngjarja e sotshme dhe përmbyllja e një marrëveshjeje për të ofruar pothuajse 34.5 milionë dollarë në fonde shtesë për asistencë në zhvillim për popullin e Kosovës për të mbështetur rritjen ekonomike, qeverisjen e mirë, integrimin në Evropë, besoj se qartazi e thekson këtë pike”, ka thënë Hovenier./teve1.info/
