Ministria e Ekonomisë ka thënë se kërkesa e presidentes Vjosa Osmani për dhurimin e një minerali/kristali nga Muzeu Shtetëror i Mineraleve dhe Kristaleve “Trepça” për presidentin amerikan Donald Trup ka ardhur me vonesë.
Sipas ministrisë, kërkesa ka ardhur një ditë para udhëtimit të Osmanit
“Ministria e Ekonomisë thekson se kërkesa nga Zyra e Presidentes për dhurimin e kristalit është pranuar më 16 shkurt 2026, përkatësisht një ditë para udhëtimit zyrtar të Presidentes të Republikës së Kosovës. Zyrtarët përgjegjës e kanë trajtuar me urgjencë kërkesën e zyrës së presidentes, por për shkak të procedurës ligjore dhe administrative, koha ka qenë e pamjaftueshme për të përmbushur kërkesën”, thuhet në reagim.
Nga ministria kanë mohuar se refuzimi është bërë për shkak të zhvillimeve politike.
“Dhurimi apo shkëmbimi mund të realizohet vetëm me vendim përfundimtar, pas rekomandimit të dhënë nga komisioni profesional. Rrjedhimisht, për përmbylljen e këtij procesi, afati kohor ka qenë tejet i shkurtër. Pretendimet që e lidhin këtë çështje me zhvillime politike apo me marrëdhënie ndërmjet institucioneve janë interpretime të njëanshme mediale dhe nuk reflektojnë faktet, për të cilat gazeta “Nacionale” nuk ka kërkuar qëndrimin zyrtar nga Ministria e Ekonomisë”, thuhet në sqarimin e Ministrisë së Ekonomisë.
