Deputeti i LDK-së, Avdullah Hoti, tha se marrëveshja e Ohrit u reduktua në themelim urgjent të Asociacionit dhe sipas tij asgjë tjetër, raporton teve1.info
Përmes një postimi në Facebook, Hoti ka shkruar se me këtë marrëveshje Kosova ka hyrë në rrugën më të gjatë për të hyrë në marrëveshje finale me njohje reciproke.
Sipas Hotit, deri në zgjidhjen e status-quos së re, do të vazhdoj ikja të rinisë dhe paqartësia e investitorëve.
“E gjithë Marrëveshja e Ohrit po reduktohet në themelimin urgjent të Asociacionit. Asgjë tjetër. Ai që e kishte kundërshtuar me dhunë këtë Asociacion, e që kishte marrë mbështetje qytetare për këtë kundërshtim, tani do ta zbatojë në praktikë.
Pesë vendet mos-njohëse të BE-së nuk kanë ndryshuar qëndrim edhe pas arritjes së Marrëveshjes së Ohrit.
Në javën e ardhshme fillon dialogu në Bruksel për zbatim të marrëveshjes.
Dialog për njohje reciproke nuk ka askund dhe nuk pritet të ketë.
Kemi hyrë në rrugën më të gjatë të mundshme për të arritur tek marrëveshja finale për njohje reciproke.
Derisa më herët dialogonim për marrëveshje finale për njohje reciproke, siç konfirmohej vazhdimisht nga letrat e vendeve mike drejtuar Kosovës dhe Serbisë, tani këta mashtrues e kanë betonuar një status quo të re. Një Zot e di kur do të mund ta thyejmë këtë status quo dhe ta përmbyllim marrëveshjen me njohje reciproke. Deri atëherë do të mbizotëroj paqartësia për investitorët e jashtëm, do të vazhdojnë të ikin kuadrot dhe rinia”, ka shkruar Hoti.