Përmes një statusi në Facebook, Hoti e ka kritikuar Qeverinë për mbajtjen e, siç ka thënë ai 700 milionë eurove në bankë, derisa sipas tij inflacioni e ka varfëruar buxhetin e familjeve në Kosovë.
“Inflacioni mesatar në tetor 2022, krahasuar me tetorin 2021, ka arritur në 12.7%. Por mesataret ndonjëherë e shtrembërojnë realitetin. Njerëzit nuk blejnë çdo ditë frigoriferë, pajisje shtëpiake apo vetura. Ata nuk ndërtojnë çdo vit shtëpi apo nuk blejnë banesë. Por njerëzit çdo ditë, çdo javë apo çdo muaj blejnë bukë, qumësht, vezë, vaj ushqimor, sheqer, mish, si dhe paguajnë energjinë, mbushin veturën me naftë apo blejnë dru për dimër. Çmimet për këto mallra janë rritur nga 20% deri në 56%”, ka shkruar ndër të tjera Hoti.
