Deputeti i Lidhjes Demokratike të Kosovës, Avdullah Hoti ka thënë se ministri i Pushtetit Lokal, Elbert Krasniqi duhet të përgjigjet se pse i kanë shpenzuar 3 milion euro me kontrata njëburimore për ndërtimin e shtëpive për komunitete.
Hoti në Facebook ka thënë se bashkëpunimi i Qeverisë me pushtetin lokal kurrë nuk ka qenë më i keq.
Derisa theksoi se Krasniqi ka përgjegjësi që për dy vite me radhë janë vonuar të hyrat vetanake për komunat dhe sipas tij, i kanë bllokuar investimet kapitale nëpër komuna.
“Ministri i Pushtetit Lokal duhet të përgjigjet përse i ka shpenzuar 3 milion euro me kontrata njëburimore për ndërtimin e shtëpive për komunitete, siç kanë gjetur organizatat joqeveritare. Nuk ka kompani private të mjaftueshme në treg për të ndërtuar shtëpi njëkatëse, dy-tri dhomëshe?! Sa për grantet e pushtetit lokal, Kosova ka qenë shembull për pushtetet lokale në rajon dhe më gjerë për objektivitetin e ndarjes së granteve nga pushteti qendror tek ai lokal. Bashkëpunimi i Qeverisë me pushtetin lokal kurrë nuk ka qenë më i keq. Ky Ministër ka përgjegjësi që për dy vite me radhë janë vonuar të hyrat vetanake për komunat dhe i kanë bllokuar investimet kapitale nëpër komuna”, tha Hoti./teve1.info./