Në prag të 26-vjetorit të themelimit të Policisë së Kosovës dhe 18-vjetorit të rënies së zyrtarit policor Triumf Riza, u bënë homazhe pranë pllakës përkujtimore të tij në lagjen Dardania në Prishtinë.
Në këtë ceremoni morën pjesë kryeministri në detyrë Albin Kurti, ministri në detyrë i Punëve të Brendshme Xhelal Sveçla dhe drejtori i Përgjithshëm i Policisë së Kosovës Gazmend Hoxha.
Pas homazheve u vendos gurthemeli për ndërtimin e memorialit kushtuar policëve të rënë në detyrë.
Kryeministri Kurti, tha se Triumf Riza ishte njeri dhe polic i guximshëm, i cili u inkuadrua në Policinë e Kosovës në moshën 20-vjeçare për t’i shërbyer rendit publik dhe sundimit të ligjit.
Kurti e quajti Rizën “djalë fenomenal i kryeqytetit”, siç tha ai që ka dashur vetëm drejtësinë.
Ministri në detyrë i Punëve të Brendshme, Xhelal Sveçla u shpreh se Triumf Riza është simbol i luftës ndaj krimit e shtrirjes së ligjshmërisë në kryeqytet.
Sveçla tha se duke respektuar sakrificën e tij, ne respektojmë të gjithë ata që punojnë për rend e ligj dhe forcim të shtetit të Kosovës.
