Korporata Energjetike e Kosovës ka filluar në orët e hershme të mëngjesit procedurat për rikthimin në operim të njësisë A4 të Termocentralit Kosova A.
Përmes një njoftimi, KEK ka bërë të ditur se procesi i startimit përbën një fazë të domosdoshme teknologjike për vënien në funksion të njësive që përdorin linjitin si lëndë djegëse.
Gjatë kësaj procedure, për shkak të ngrohjes graduale të kaldajës dhe stabilizimit të djegies, tymi që lirohet nga oxhaku mund të jetë përkohësisht më i dukshëm.
Sipas korporatës, kjo fazë e procesit për njësinë A4 pritet të zgjasë rreth tri deri në katër orë.
KEK u ka bërë thirrje banorëve të zonës dhe Komunës së Obiliqit për mirëkuptim, duke theksuar se është në dijeni të shqetësimeve që mund të shkaktojë tymi gjatë këtij procesi.
Pas përfundimit të procedurave të startimit, njësia A4 pritet të sinkronizohet me rrjetin elektroenergjetik dhe më pas të kalojë gradualisht në operim të qëndrueshëm, thuhet në njoftimin e KEK-ut.
