Përshëndetjen nga larg e kanë më të lehtë.
E nga afër, mërzia u dallohet qartazi në fytyrë.
Përqafime nga familjarët morën të gjithë ata që u nisën në mërgim të hënën.
Por në radhë, tashmë po presin edhe qytetarë që për herë të parë po e shfrytëzojnë të drejtën e lëvizjes së lirë.
Kjo pasi nga ky fillim vit, Kosovës i është hequr regjimi i vizave.
“Me thënë të drejtën kemi pas dëshirë edhe ma herët kemi tentu, po nuk na pranuan. E tash që u hoqën vizat, mezi po pres. Shkoj pak te djali, ai po vjen këtu boll po ta shoh Gjermaninë najherë edhe unë”, tha Besim Thaçi.
E kërkesa për udhëtim pa viza, sipas agjencioneve turistike është e madhe.
“T’u e marrë parasysh që sot është dita e parë e liberalizimit të vizave, kërkesa ka qenë e mjaftueshme, mirëpo problemi është që biletat janë shtrenjtë edhe për këtë arsye nuk po mundet me u shfrytëzu si duhet, por presim që në të ardhmen të ketë lëvizje më të lirë”, tha Jahir Tahiri, pronar i agjencionit turistik.
E kjo pamje në Aeroportin Ndërkombëtar ‘’Adem Jashari’’, këtë të hëne të 1 janarit tregon shumë.
Krahasuar me periudhën e njëjtë të vitit të kaluar, këtë një janar ka fluturime shtesë. Vetëm gjatë ditës së sotme do të realizohen 35 fluturime vetëm në shkuarje.
E ndonëse po shkon për kurbet për shkaqe shëndetësore, ish ushtari i UÇK-së, Mustafë Kajtazi e dëshiron kthimin në atdhe.
“Kosova e ka fitu një betejë të madhe për shkak të liberalizimit, po është edhe një humbje e madhe se njerëzit mendojnë se ata dalin edhe menjëherë kanë me i mbërri paret hazër. Por është e kundërta, tre muj ditë me nejt edhe duhet apet me u kthy këtu. Unë si ta kisha shëndetin dhe si ta kisha një rrogë qysh e kemi pasë me dinjitet si ushtar i UÇK-së, sot edhe pse jam shtetas gjerman do e kisha lënë mërgimin e do të isha kthy këtu”, u shpreh Mustafë Kajtazi, ish-ushtar i UÇK-së.
Liberalizimi i vizave u mundëson qytetarëve të Kosovës, që kanë pasaporta biometrike, të qëndrojnë deri në 90 ditë – brenda gjashtë muajsh – në cilindo nga 27 shtetet anëtare të zonës Schengen.
