Ambasadori amerikan në Serbi, Christopher Hill tha se përshkallëzimi i dhunës në Banjskë të Kosovës është “ngjarje tragjike” dhe se po shqyrtohen hapat e mëtejshëm.
Hill theksoi se po zhvillohen procese për të inkurajuar dialogun dhe se ky proces sipas tij, duhet të forcohet në ditët në vijim.
“Ne të gjithë duhet ta dënojmë vrasjen e një pjesëtari të policisë së Kosovës dhe gjithmonë mbajmë zi për humbjen e jetëve, por duhet të vazhdojmë me procesin politik. Po zhvillohen procese për të inkurajuar dialogun. Kjo situatë po trajtohet shumë seriozisht dhe po zhvillohen diskutime të shumta se çfarë hapash të mëtejshëm duhet të ndërmerren”, tha Hill, shkruan Danas.
Ndryshe, një grup i armatosur, që sipas autoriteteve përbëhej prej rreth 30 personash, sulmuan Policinë e Kosovës në Banjskë të Zveçanit më 24 shtator, duke lënë të vrarë rreshterin Afrim Bunjaku.
