Ministrja e Drejtësisë, Albulena Haxhiu, ka reaguar pas deklaratës së kryeprokurorit të Prokurorisë Speciale, Blerim Isufaj, i cili sot konfirmoi se i ishte hequr urdhërarresti Milan Radoiçiqit, por më pas ishte rikthyer.
Ndërkohë, lidhur me heqjen e urdhërarrestit, Haxhiu tha se po të mos ishte hequr, ai do ta kishte të pamundur operimin në veri të vendit, duke iu referuar edhe sulmit terrorist në Banjskë, përgjegjësinë për të cilin e ka marrë vetë Radoiçiq.
“Po të mos hiqej fletarresti (mos)operimi i tij do të ishte krejt ndryshe apo edhe i pamundur në veri të vendit. Kur dikujt i hiqet fletarresti praktikisht i bie që diçka ka ndërruar për të mirë, por këtë vit nga ky person që ju hoq fletarresti u organizua tentim-aneksimi i veriut me 24 shtator 2023 në Banjskë të Zveçanit. A e ka të qartë ky kryeprokuror që kjo çështje është preokupim kombëtar e shoqëror dhe nuk ka këtu vetëm Pikë?”, ka shkruar Haxhiu në Facebook.
Minstrja tha se drejtësia do të duhej të ishte e pavarur dhe ajo është e pavarur vetëm në sensin ndërinstitucional.
“Jo rastësisht aktgjykimet kanë frazën ‘’Në emër të popullit’’, sepse sikur secili institucion shtetëror i nënshtrohet vullnetit të shprehur të popullit që i shërben dhe prej nga e merr legjitimitetin. Pra, drejtësia është e pavarur vetëm kur ajo njëmend është në përputhje me vullnetin e popullit”.
“Cenimi që Serbia për mbi 20 vjet i ka bërë rendit juridik dhe kushtetues në veri të vendit me në krye akter terrorist si Milan Radojçiq, veriu, siguria kombëtare nuk janë thjesht çështje të ftohta juridiko-penale të një prokurori apo kryeprokurori që me lehtësinë e botës thotë se vetëm ai i di arsyet pse i ka hequr fletarrestin dikujt si Milan Radojçiq. Dhe pikë, siç shprehet ai”.
Ndërkaq, në një konferencë për media Isufaj tha se s’i zbulon arsyet për publikun se pse ka dhënë pëlqimin që t’i hiqet urdhërarresti e më pas t’i kthehet sërish.
