Presidentja Vjosa Osmani ka mirëpritur heqjen e plotë të masave ndëshkuese të Bashkimit Evropian ndaj Kosovës, që ishin vendosur qysh në vitin 2023.
Osmani ka thënë se këto masa ishin vendosur padrejtësisht, teksa ka falenderuar shtetet partnere për mbështetjen.
Ajo ka thënë se Kosova mbetet e përkushtuar të vazhdojë përparimin në rrugën drejt statusit të kandidatit për anëtarësim në BE.
“Bazuar në vendimin e shpallur në dhjetor nga Presidentja e Komisioni Evropian, Ursula von der Leyen, për të hequr të gjitha masat e BE-së ndaj Kosovës, pas Samitit BE–Ballkani Perëndimor, ne mirëpresim sot konfirmimin nga Komisioni se ky vendim tani është zbatuar plotësisht. Faleminderit Komisionit dhe të gjithë partnerëve tanë nga shtetet anëtare për mbështetjen në mbylljen e kësaj çështjeje, që rezultoi në heqjen e masave të padrejta që ndikuan negativisht në jetën e popullit të Kosovës. Kosova mbetet e përkushtuar të punojë ngushtë me BE-në dhe të vazhdojë përparimin në rrugën drejt statusit të kandidatit për anëtarësim në BE”, ka shkruar Osmani në X.
Komisioni Evropian ka konfirmuar sot se janë hequr të gjitha masat financiare ndaj Kosovës.
“Mund të konfirmoj se Komisioni Evropian ka liruar të gjithë ndihmën financiare që më parë ishte nën masa dhe gjithashtu po planifikojmë të riangazhohemi plotësisht me homologët tanë në Kosovë në mënyrë që ta rikthejmë Kosovën në rrugën e duhur në agjendën e saj të BE-së”, tha Jiri Plecity, përfaqësues i Komisionit Evropian.
Masat ndaj Kosovës u vendosën më 2023 dhe kishin të bënin me pezullim të financimit dhe të takimeve dypalëshe midis zyrtarëve evropianë dhe përfaqësuesve të Qeverisë së Kosovës.
Masat u vendosën si përgjigje për shkak të tensioneve në veriun e Kosovës, pasi kryetarët shqiptarë të katër komunave në veri morën mandatin.
