Të enjten zhvillohet ndeshja e dytë finale e plejofit në Superligën e Kosovës në hendboll në konkurrencë të meshkujve, në mes të Kastriotit dhe Rahovecit.
Ndeshjen e parë, të luajtur të dielën mbrëma, e fitoi Rahoveci.
Ndeshja ishte shumë e fortë, me shumë duele e gola të bukur teksa njëjtë pritet të jetë edhe të enjten prej orës 20:00 në palestrën “Bill Clinton” në Ferizaj.
Vendasit synojnë fitore për ta dërguar serinë finale në ndeshjen e tretë nddërkohë “vreshtarët” udhëtojnë për ta festuar titullin.
Rahoveci është në momentin më të mirë si klub. Vitin e kaluar e fitoi titullin e parë të kampionit, ndërsa bëri paraqitje të mirë edhe në Evropë.
Këtë edicion garues, pjesën e rrregullt të garave e përfundoi pa humbje të pësuar e në gjysmëfinale e eliminoi Prishtinën.
Edhe Kastrioti është në moment shumë të mirë.
Ka fituar Kupën e Kosovës në turneun e organizuar në Ferizaj, në atmosferë të shkëlqyer. Kupën e Kosovës, skuadra ferizajase e fitoi për herë të dytë rresht. Por titullin e fundit të kampionit, Kastrioti e ka fituar në vitin 2011.
Prej atëherë ka dominuar skuadra pejane, Besa Famgas, të cilën Kastrioti e mposhti në gjysmëfinale të plejofit dhe në finale të Kupës.
