Numri i personave që kanë kërkuar ndihmë mjekësore vetëm gjatë një jave nga helmimet në dy lokale të ushqimeve të shpejta ka arritur afër 250. Nga Agjencia e Ushqimit dhe Veterinarisë tregojnë se tashmë do të kenë kontrolle të shtuara ndaj bizneseve të tilla dhe nuk do të ketë tolerancë. Kurse, anëtari i Komisionit për Shëndetësi thotë se kjo është brengosëse andaj kërkon shtimin e numrit të inspektorëve.
Vetëm për një javë, rreth 250 persona u helmuan në dy lokale të ushqimeve të shpejta në Mitrovicë e Malishevë.
Të shtunën, në Qendrën e Mjekësisë Familjare në Malishevë kërkuan ndihmë mjekësore mbi 215 persona, gjendja e të cilëve është stabile.
Kurse, në Mitrovicë u vërtetua tashmë se deri te helmimi erdhi si pasojë e baktereve ‘Salmonella’ që u gjendën në produktet e këtij biznesi.
E kjo ka aktivizuar Agjencinë e Ushqimit dhe Veterinarisë, ku zëdhënësi Lamir Thaçi tregon se tashmë kanë filluar inspektimet e rrepta tek këto biznese në gjithë vendin.
Ai tregon edhe për mbylljen e disa lokaleve që ushtrojnë këtë biznes e që siç thotë ai, kishte kushte jo të mira higjienike.
Këto dy raste kanë alarmuar edhe deputetët e Kuvendit të Kosovës.
Anëtari i Komisionit për Shëndetësisë dhe Mirëqenie Sociale, Shemsedin Dreshaj kërkon nga institucionet përgjegjëse të bëjnë kontrolle më të shtuara.
Vetëm gjatë së hënës gjatë inspektimit janë iniciuar gjashtë lëndë kundërvajtësve dhe janë shqiptuar disa gjoba ndaj disa bizneseve.
