Gjatë tërë ditës, aeroplanët ngriten e aterojnë në Aeroportin e Prishtinës.
Por të hënën e 13 korrikut, një helikopter u ballafaqua me një problem.
Ai gjatë kohës së fluturimit, u pengua me rreze laseri.
“Për shkak te lartësisë se aeroplanit, nuk dihet prej nga erdhi kjo rreze laseri, por sipas përshkrimit te pilotit ka qenë në komunën e Lipjanit, afër fshatit Janjevë.
Madje ky mjet i përkiste KFOR-it.
Këta të fundit, përmes një “emaili” një ditë më vonë e njoftuan Agjencinë e Shërbimeve të Navigacionit Ajror.
Në bazë të informatave që ata kanë, ngjarja ndodhi të hënën në mbrëmje.
“Rasti ka ndodhur me 13.07.2026, ndërsa informatën e kemi pranuar të nesërmen përmes emailit nga KFOR. Në bazë të informatave të dhëna në email, rasti ka ndodhur në afërsi të Janjevës. Sipas informatave të pranuara, konsiderohet që nuk ka qenë në fazën e aterimit, mirëpo ka qenë në fazën e fluturimit. Ka qenë helikopter i KFOR-it”, shkruhet në njoftim.
Rasti është iniciuar te Policia tek të enjten, të cilët njoftuan se hetimet po vazhdojnë.
Ndërsa as nga Prokuroria Themelore e Prishtinës nuk dhanë shumë informacione, por bënë të ditur se po grumbullohen prova.
“Pas pranimit të informatës nga Policia e Kosovës, Prokurori i Shtetit ka iniciuar rastin si ‘Rrezikimi i sigurisë së aviacionit civil’. Me autorizim të Prokurorit të Shtetit, Policia e Kosovës dhe të gjithë njësitet e tjera përkatëse janë duke ndërmarr veprime për grumbullimin dhe mbledhjen e provave të nevojshme në lidhje me këtë rast. Për çdo zhvillim të mëtutjeshëm lidhur me këtë çështje, do të njoftoheni me kohë”, deklaroi Kaltrina Shala, zëdhënse e prokurorisë themelore në Prishtinë.
Televizioni i ka dërguar pyetje edhe KFOR-it për detaje shtesë, por deri në publikimin e kronikës nuk ka marrë përgjigje.
