Deputeti i Lidhjes Demokratike të Kosovës, Lutfi Haziri ka deklaruar se një marrëveshje është përtej urgjencës pasi sipas tij Kosova përfundimisht është në krizë të rëndë politike.
Haziri para fillimit të seancës për konstituimin e Kuvendit është shprehur se për LDK-në nuk është me rëndësi emri i përveçëm por parimi në mënyrë që konstituimi i Kuvendit të finalizohet sa më shpejt.
“Gjithmonë ka mundësi që duhet të shtjerren dhe të gjendet një rrugë nuk ka të bëjë për mua dhe LDK-në emir I përveçëm por parimi në mënyrë që konstituimi me u finalizu dhe një marrëveshje politike është përtej urgjencës sepse Kosova përfundimisht është në krizë të rëndë politike e cila në mungesë të Kuvendit në rradhë të parë e pamundëson me ec përpara…”, ka thënë ai.
Ai ka shtuar se LDK-ja nuk është mekanizëm votues sipas dëshirave të partisë së parë e as patericë që ndihmon zhbllokimin e dikujt që sipas tij nuk ka vullnet të punojë.
“Reagimi ynë është politik, ne kemi marrë pjesë vazhdimisht në votim. Nuk jemi mekanizëm votues sipas dëshirave të partisë së parë e as patericë që krijon çdo situatë për ta debllokuar dikë që nuk ka vullnet të punojë”, është shprehur Haziri.
