Lidhja Demokratike e Kosovës ka propozuar sot një organizim të përbashkët me shoqërinë civile e mërgatën, për t’u bërë bashkë për të bashkëbiseduar rreth dialogut. Rreth kësaj nisme, dha detaje nënkryetari i kësaj partie, Lutfi Haziri.
Ai tha se të gjithë sot janë të përjashtuar nga dialogu, përfshirë këtu edhe presidenten Vjosa Osmani dhe kryetarin e Kuvendit, Glauk Konjufca.
“Është një ofansivë politike, duke u ndjerë të përgjegjshëm para krizës dhe situatës që jemi tash e disa muaj, në të cilën institucionet shkencore, organizatat e shoqërisë civile, partitë politike, mërgata, të gjithë ata që sot janë të përjashtuar prej dialogut, që LDK me i bë bashkë, me i dëgju, me bashkëbisedu, dhe me ndërtu një frymë të përbashkët karshi dialogut i cili ka konsencus. Por si proces ne i njohim të drejtën kushtetuese që kryeministri me përfaqësu Kosovën në këtë dialog dhe s’kemi asnjë lloj dyshimi për këtë çështje. Por krejt janë të përjashtum në Kosovë. Fatkeqësisht edhe presidentja edhe kryekuvendari janë të përjashtum”, deklaroi ai në “Info Nata” në Tëvë 1.
Ish-kryetari i Gjilanit shtoi se proceset në Kosovë janë të rrezikuara nga Qeveria dhe kjo është koha që sipas tij, partitë opozitare të reagojnë. /Teve1.info/
