Me rastin e Ditës së Fëmijëve, ushtruesja e detyrës së Presidentit të Kosovës, Albulena Haxhiu, së bashku me ministrin në detyrë të Shëndetësisë, Arben Vitia, kanë vizituar Klinikën e Pediatrisë në Qendrën Klinike Universitare të Kosovës, për të qenë pranë fëmijëve që po trajtohen dhe familjeve të tyre.
Haxhiu ka theksuar rëndësinë e kujdesit dhe mbështetjes emocionale për fëmijët gjatë trajtimit mjekësor.
“Kujdesi dhe ndjeshmëria nuk janë shtesë e trajtimit mjekësor, ato janë pjesë e tij. Çdo fëmijë që kalon ditë të vështira larg shtëpisë ka nevojë jo vetëm për terapi, por edhe për ngrohtësi dhe praninë e njerëzve që u kushtojnë vëmendje”, ka shkruar ajo në Facebook.
Ajo ka shprehur mirënjohje për stafin e Klinikës së Pediatrisë, duke vlerësuar punën dhe përkushtimin e mjekëve, infermierëve dhe personelit tjetër shëndetësor.
Sipas saj, humanizmi dhe profesionalizmi që ata tregojnë çdo ditë përbëjnë një shembull të mirë të shërbimit publik.
Në fund të mesazhit të saj, Haxhiu ka theksuar se fëmijët meritojnë kujdesin më të mirë të mundshëm nga shoqëria dhe institucionet.
“Fëmijët meritojnë më të mirën prej nesh, ky është detyrimi që e kemi të gjithë, si individë dhe si institucione. Shëndet dhe gëzim për secilin prej tyre”, ka përfunduar ajo./teve1.info/
