Detyrën e mori këtë të shtunë.
Nga tani e tutje, kryeparlamentarja Albulena Haxhiu do të jetë ushtruese e detyrës të së parës së shtetit, derisa vendi të bëhet me president të ri.
Për aq kohë sa do të jetë në krye të shtetit, Haxhiu do t’i ketë kompetencat e plota.
Mirëpo, këtë pozitë, ajo s’mund ta mbajë më shumë se gjashtë muaj.
“U.d i presidentit nuk ka ndonjë akt normativ që i rregullon kompetencat ndoshta të kufizuara të saj, por kjo i ushtron të gjitha kompetencat e plota si një president valid. Kështu që presidentja i ka të gjitha duke filluar edhe nga komandanti suprem e dekretimi dhe kështu me radhë…është e sanksionuar nga neni 90 i Kushtetutës që thotë se ne momentin kur funksioni i presidentit është në vakum, brenda këtyre 6 muajve duhet të zgjidhet edhe presidenti”, tha ish-gjyqtari i Gjykatës Kushtetuese, Kadri Kryeziu.
E pikërisht kompetencat e plota në presidencë, sipas PDK-së, janë arsye që kryeministri Kurti, siç thonë ata, po zvarrit procedurat e zgjedhjes së presidentit.
Deputeti i kësaj partie, Artan Behrami, në Tëvë1 tha se ekziston rreziku që vendi të futet në një cikël të vazhdueshëm krizash politike.
“Frika ime më e madhe është, synimi i radhës i Albin Kurtit. Ky synim përbën rrezik për shtetin e Kosovës. Ai do të mundohet që nga nesër Albulena Haxhiun këtë eksperimentin që ai me qenë kryeministër në detyrë për katër vite duke prodhuar kriza, zgjedhje e pasiguri. Unë betohem që ai do të mundohet ta bëjë të njëjtën gjë me Albulena Haxhiun”, tha ai.
Edhe nga AAK, ditë më parë, kryetari i saj, Ramush Haradinaj tha se Vetëvendosje po synon fillimisht që Haxhiu ta marr postin e ushtrueses së detyrës së presidentes, e më pas të vazhdohet me procesin e zgjedhjes.
Pasi tha se vonesat janë të paarsyeshme, politologu Avdi Smajlaj druan se deklarimet e opozitës mund të jetë të sakta, marrë parasysh skenën politike vendore.
Sipas vendimit të fundit të Gjykatës Kushtetuese, afati për zgjedhjen e presidentit përfundon më 28 prill.
