Ushtruesja e detyrës së presidentes, Albulena Haxhiu ka thënë se shtrirja e sovranitetit dhe rendit kushtetues në tërë Republikës e Kosovës, përveç obligimit institucional ka qenë edhe parakusht për të mundësuar zbardhjen e fatit të të zhdukurve me dhunë.
Ajo kështu është shprehur pas njoftimit të Prokurorisë dhe Policisë së në Jakubë të Zubin Potokut është gjetur një lokacion ku dyshohet se ka mbetje mortore, pas gjetjes së atij në Kalludër të Vogël.
“Dyshimet për një varrezë të dytë masive janë një rikujtim i rëndë i krimeve të kryera gjatë luftës dhe një dëshmi se drejtësia ende nuk është vënë plotësisht në vend. Shtrirja e sovranitetit dhe rendit kushtetues në çdo pjesë të Republikës së Kosovës nuk ka qenë vetëm obligim institucional, por edhe një parakusht për të mundësuar zbardhjen e fatit të të zhdukurve me dhunë, zbulimin e varrezave masive dhe kthimin e mbetjeve mortore të viktimave te familjet e tyre”, ka shkruar Haxhiu.
Ajo ka përgëzuar dhe u ka dhënë mbështetje institucioneve që po punojnë në zbardhjen e fatit të personave të zhdukur me dhunë gjatë luftës në Kosovë.
“Çdo varrezë e zbuluar është një hap drejt së vërtetës, por edhe një dëshmi se plagët e luftës mbeten të hapura derisa të gjendet personi i fundit i zhdukur dhe përgjegjësit për këto krime të dalin para drejtësisë. Në këto momente, shprehim solidaritetin më të thellë me familjet e viktimave, të cilat për më shumë se dy dekada kanë pritur të dinë fatin e më të dashurve të tyre. Republika e Kosovës mbetet e përkushtuar që e vërteta të zbardhet plotësisht dhe kujtesa për viktimat të nderohet me dinjitet”, ka shkruar Haxhiu.
