Ushtruesja e detyrës së presidentes, njëkohësisht kryetarja e Kuvendit të Kosovës, Albulena Haxhiu, ka shprehur qëndrimin e saj lidhur me situatën politike dhe nevojën për të shmangur zgjedhjet e jashtëzakonshme. Ajo ka kërkuar që të gjitha grupet parlamentare të punojnë për arritjen e një marrëveshjeje dhe për të shmangur krizën politike.
“Së pari, mendoj që nuk është mirë që vendi të shkojë në zgjedhje të jashtëzakonshme. Unë e kam shpjeguar disa herë që kemi shumë punë para vetes, shumë reforma që duhet t’i shtyjmë përpara. Një agjendë legjislative ambicioze e Qeverisë së Republikës së Kosovës që përmban diku 174 projektligje, secili projektligj më i rëndësishëm se tjetri,” ka thënë Haxhiu.
Ajo ka shtuar se zgjedhjet e jashtëzakonshme do të ishin një hap pas për vendin dhe do të vononin progresin në shumë fusha të rëndësishme.
“Unë kam kërkuar edhe publikisht që të gjitha grupet parlamentare të bëjnë përpjekje maksimale që vendi të mos shkojë në zgjedhje të jashtëzakonshme, por që t’i jepet mundësia takimeve dhe një marrëveshje për çështjen e zgjedhjes së Presidentit apo Presidentes së vendit.”
Për më tepër, Haxhiu ka shprehur shqetësimin për qasjen e opozitës, duke theksuar se kjo po e vështirëson arritjen e një marrëveshjeje dhe po i jep përparësi bllokadave politike.
“Mendoj që me këtë qasje të opozitës nuk po tregohet përkushtim dhe vullnet që vendit t’i jepet një president me mandat pesë vjeçar. Po më duket si ‘deja vu’. Domethënë nëse flasim për situatën aktuale dhe krahasojmë me atë çfarë ka ndodhur vitin e kaluar, duket situatë e njëjtë,” ka deklaruar Haxhiu.
Për të siguruar që vendi të mos shkojë në zgjedhje të jashtëzakonshme, Haxhiu ka ofruar edhe pozitën e kryetarit të Kuvendit për opozitën, duke theksuar se kjo është një mundësi për të ndihmuar në tejkalimin e krizës.
“Po patjetër. Kryeministri Kurti i ka thënë edhe LDK-së edhe PDK-së. Kjo nuk është pozita ime. Nuk është pozita ime, nuk e kam me tapi. Njerëzit vijnë e shkojnë, dhe mendoj që këtu duhet të dëshmojmë që e kemi për vendin dhe jo për interesat personale,” ka thënë Haxhiu.
Në përmbyllje, Haxhiu ka apeluar për rifillimin e takimeve ndërpartiake, duke thënë se duhet dëshmuar vullneti dhe gatishmëria për të arritur një marrëveshje për zgjedhjen e presidentit dhe për të siguruar stabilitetin e vendit.
“Ne kemi ofruar edhe pozitën e Kryetarit të Kuvendit, sepse çka na duhet pozita e Kryetarit të Kuvendit nëse dikush e kërkon këtë dhe nëse kjo e parandalon zgjedhjet e jashtëzakonshme?” ka shtuar ajo.
Haxhiu ka përfunduar duke theksuar se, pavarësisht ofertave të bëra, opozita ka refuzuar të ulë në tryezë për të arritur një marrëveshje, dhe se duhet të vazhdojnë përpjekjet për të zgjedhur një president të vendit sa më shpejt.
