Kryetarja e Kuvendit të Kosovës, Albulena Haxhiu, ka përkujtuar 27-vjetorin e Masakrës së Studenicës në Istog dhe Masakrës së Llashticës në Gjilan, duke i cilësuar ato si dy nga kapitujt më të dhimbshëm të pranverës së vitit 1999.
Ajo tha se më 13 prill në Studenicë të Istogut, forcat serbe ekzekutuan dhjetë civilë të pafajshëm, mes tyre anëtarë të familjeve Lipaj dhe Zeqiri, përfshirë gra dhe vajza të mitura.
“Mes tyre ishin katër vajza nën moshën pesëmbëdhjetëvjeçare, katër gra dhe dy burra, jetë të ndërprera mizorisht në prag të së ardhmes së tyre”, ka deklaruar Haxhiu.
Duke folur për ngjarjet në Llashticë të Gjilanit, ajo theksoi se nga 13 deri më 30 prill të vitit 1999 janë kryer një varg krimesh ndaj civilëve të pambrojtur, pa dallim moshe, duke përfshirë fëmijë dhe të moshuar.
Sipas saj, këto ngjarje përbëjnë dëshmi të dhunës së ushtruar ndaj popullsisë civile gjatë luftës në Kosovë.
Haxhiu ka shtuar se Studenica dhe Llashtica mbeten kujtesë e përhershme e dhimbjes dhe sakrificës mbi të cilën, sipas saj, u ndërtua liria e Kosovës.
