Haxhiu i tha prokurorit “dorëzohu”, Çitaku: Kjo mendësi nuk kalon në Kosovë

Nënkryetarja e PDK-së, Vlora Çitaku ka reaguar ndaj ministres së Drejtësisë, Albulena Haxhiu pasi kjo e fundit në seancën e mbajtur sot për gazin lotsjellës, i tha prokurorit të rastit “Dorëzohu, s’është vonë”.

Përmes një postimi në Facebook, Çitaku thotë se Lëvizja Vetëvendosje i do të dorëzuar të gjithë, duke filluar nga mjekët, mësuesit policët, prokurorit, mediat e opozitën.

“‘Dorëzohu, s’është vonë’ i paska thënë prokurorit e pandehura Albulena Haxhiu, Ministre e Drejtësisë. Sepse, ashtu, të dorëzuar i duan të gjithë. Të dorëzuar i duan mjekët, mësuesit, policët, prokurorët, mediat, shoqërinë civile, opozitën”, ka shkruar ajo.

Sipas saj, kjo mendësi nuk kalon në Kosovë.

Ministrja e Drejtësisë, Albulena Haxhiu i ka bërë thirrje prokurorit Ilaz Beqiri që të dorëzohet dhe të tërhiqet nga aktakuza pasi mungon ekspertiza dhe faktet për gazin lotsjellës.

Thirrja e Haxhiut drejtuar prokurorit është bërë të premten në seancën gjyqësore ku ajo bashkë me deputeti Pal Lekaj dhe ish-deputetet Donika Kadaj-Bujupi e Besa Baftiu akuzohen se më 19 shkurt 2016 kanë poseduar jashtëligjshëm në Parlament nga një bombol të gazit.

“Prandaj, ndonëse pas 7 vitesh i kërkoj prokurorit që të dorëzohet, të tërhiqet nga aktakuza. Nuk është vonë asnjëherë për të bërë një veprim te tillë”, ka deklaruar Haxhiu. /Teve1.info/