Ushtruesja e detyrës së presidentes së Kosovës, Albulena Haxhiu, u ka bërë thirrje partnerëve ndërkombëtarë, përfshirë mekanizmat e OKB-së, Bashkimin Evropian, OSBE-në dhe Këshillin e Evropës, që çështja e të drejtave të shqiptarëve në Luginën e Preshevës të trajtohet me prioritet dhe që Serbia të zbatojë plotësisht rekomandimet e Komitetit për Eliminimin e Diskriminimit Racor (CERD).
Në një reagim publik në Facebook, Haxhiu ka theksuar se vërejtjet përfundimtare të CERD-it ndaj Serbisë, sipas saj, konfirmojnë shqetësimet e ngritura prej vitesh nga shqiptarët në Luginë dhe institucionet e Kosovës.
Ajo ka përmendur gjithashtu rezolutën e miratuar nga Kuvendi i Kosovës më 24 prill 2026, e cila trajton avancimin e përkujdesjes institucionale për shqiptarët në Preshevë, Medvegjë dhe Bujanoc, duke e cilësuar këtë si përgjegjësi shtetërore që tashmë, sipas saj, ka edhe dimension ndërkombëtar.
Haxhiu ka thënë se “pasivizimi i adresave” përbën diskriminim dhe cenim të të drejtave themelore, pasi, sipas saj, qytetarëve u mohohen dokumentet, shërbimet dhe siguria juridike.
Ajo ka kërkuar që çështja e të drejtave të shqiptarëve në Luginë të mos mbetet në margjinat e raporteve ndërkombëtare, por të përfshihet në mënyrë të qartë në dialogun politik dhe në monitorimin e respektimit të të drejtave të pakicave./teve1.info/
