Ushtruesja e Detyrës së Presidentes së Republikës së Kosovës, Albulena Haxhiu, i ka dërguar letër Presidentes së Parlamentit Evropian, Roberta Metsola, dhe Përfaqësueses së Lartë të Bashkimit Evropian për Punë të Jashtme dhe Politikë të Sigurisë, njëherësh Zëvendëspresidente e Komisionit Evropian, Kaja Kallas, përmes së cilës ka ftuar Bashkimin Evropian të dërgojë Mision Vëzhgues të Zgjedhjeve për zgjedhjet e parakohshme për Kuvendin e Republikës së Kosovës, të caktuara për datën 7 qershor 2026.
Sipas njoftimit zyrtar, Haxhiu në letrën e saj ka bërë të ditur se, në përputhje me përgjegjësitë e saj kushtetuese, ka nxjerrë vendimin për caktimin e datës së zgjedhjeve të parakohshme.
Ajo ka theksuar rëndësinë e këtij procesi dhe ka ftuar Bashkimin Evropian që të angazhojë një mision të pavarur vëzhgues për të monitoruar zhvillimin e zgjedhjeve.
Në letrën e saj, U.D. Presidentja ka vlerësuar se prania e misionit të BE-së do të ndihmonte në forcimin e transparencës, kredibilitetit dhe integritetit të procesit zgjedhor, duke reflektuar përkushtimin e Kosovës ndaj standardeve demokratike dhe zgjedhjeve të lira.
“Republika e Kosovës e ka vlerësuar vazhdimisht rolin e Bashkimit Evropian në mbështetjen e institucioneve demokratike dhe në avancimin e standardeve zgjedhore. Ftesa për dërgimin e Misionit Vëzhgues është vazhdim i kësaj praktike institucionale dhe shprehje e përkushtimit të Kosovës për një proces zgjedhor të hapur, transparent dhe të besueshëm”, thuhet në fund të njoftimit të Presidencës./teve1.info/
