Ministrja e Drejtësisë, Albulena Haxhiu, tha se opozita nuk ka kauzë e as plan, për çka i ka quajtur palaço.
Kjo deklaratë ngjalli reagime nga opozita, por edhe nënkryetarja e Kuvendit të Kosovës, Sarandaj Bogujevci, e cila kërkoi nga Haxhiu që të ketë kujdes me gjuhën parlamentare.
“Nuk kemi nevojë për leksione prej juve, përveç se me ju thënë që jeni opozita pa kauzë, jeni opozitë pa plan, fatkeqësisht për ne si qeveri që ta kemi një opozitë pa kauzë, pa plan, pa strategji dhe e cila çka t’i del gjatë ditës diçka e bën temë në Kuvendin e Kosovës. Ju kështu jeni, kjo është fatkeqësi për neve, sepse ne kishim dashur një qeveri tjetër, jo kështu si palaço”, tha ajo.
Madje, Haxhiu i ka replikoi shefit të Grupit Parlamentar të PDK-së, Abelard Tahiri, i cili bëri thirrje që vendi të shkojë në zgjedhje.
“Kur të doni shkojmë në zgjedhje, shpërndajeni kuvendin. Sepse janë disa mënyra se si shkohet në zgjedhje të jashtëzakonshme: shpërndarja e kuvendit, dorëheqja e kryeministrit por pastaj është edhe raundi tjetër siç besoj e dini që e ka sqaruar Gjykata Kushtetuese dhe rrëzimi i qeverisë. Rrëzimi nuk mund të bëhet, qeveria e ka shumicën, dorëheqja s’ka arsye për të bërë, sepse qeveria po i shërben interesave të qytetarëve, po vepron në përputhje me zotimet që i kemi dhënë para qytetarëve. Ka mbetur e treta, shpërndajeni kuvendin. Unë besoj që grupi parlamentar aq sa deputetë i ka do ta votojë shpërndarjen e kuvendit, nëse dëshironi të shkoni në zgjedhje, shkojmë”, përfundoi ajo.
Haxhiu kështu u shpreh në seancën e sotme plenare ku po diskutohet për raportin e Departamentit Amerikan të Shtetit./teve1.info/.
