U.D. e Presidentes së Republikës së Kosovës, Albulena Haxhiu, ka dekoruar me Medaljen Presidenciale Ushtarake Kolonelin A. J. Berg, në shenjë vlerësimi për kontributin e tij të jashtëzakonshëm në forcimin e partneritetit strategjik dhe bashkëpunimit ushtarak ndërmjet Republikës së Kosovës dhe Shteteve të Bashkuara të Amerikës.
Ceremonia u mbajt në përfundim të mandatit të Kolonelit Berg si Atashe i Mbrojtjes i SHBA-së në Kosovë.
Me këtë rast, Haxhiu e falënderoi atë për angazhimin e tij të vazhdueshëm në mbështetjen e zhvillimit dhe modernizimit të Forcës së Sigurisë së Kosovës (FSK), avancimin e bashkëpunimit ndërinstitucional dhe thellimin e marrëdhënieve në fushën e mbrojtjes ndërmjet Kosovës dhe Shteteve të Bashkuara.
Ajo vlerësoi se kontributi i Kolonelit Berg ka qenë i rëndësishëm në forcimin e partneritetit ndërmjet dy vendeve dhe në mbështetjen e proceseve që lidhen me zhvillimin e kapaciteteve mbrojtëse të Kosovës.
Medalja Presidenciale Ushtarake iu nda si shenjë mirënjohjeje për shërbimin dhe përkushtimin e tij në avancimin e bashkëpunimit ushtarak dhe marrëdhënieve strategjike mes Kosovës dhe SHBA-së./teve1.info/
