Ish-deputeti i Kuvendit nga Partia Demokratike e Kosovës, Nait Hasani, për procesin gjyqësor ndaj katër ish-krerëve të Ushtrisë Çlirimtare të Kosovës në Gjykatën Speciale ka thënë se është ngjarje historike për popullin e Kosovës.
Hasani në emisionin “Info Nata” në Tëvë1, ka thënë se Gjykata Speciale vazhdon të merret me raste individuale dhe kolektive që ta luftojnë UÇK-në.
“Fillimi i procesit gjyqësor më 3 prill ka qenë një ngjarje mjaftë e rëndësishme dhe historike për popullin e Kosovës, për gjykatën, për neve dhe ushtrinë tonë, për shkak se për herë të parë ne dalim si Ushtri Çlirimtare e Kosovës para Gjykatës Speciale, e cila është themeluar më 2015 nga presionet politike të miqve tanë ndërkombëtarë atëherë që na detyruar ta votojmë. Dalja e krerëve të Ushtrisë Çlirimtare të Kosovës para drejtësisë kinse e themeluar me një raport të Dick Marty-it i sponsorizuar po ashtu nga Serbia, me dosje të serbëve edhe të kaluar te Dick Marty me raportin të tij me thashetheme për shtëpinë e verdhë, e cila në aktakuzë nuk prezanton, ku edhe pas gjithë kësaj ajo gjykatë vazhdon dhe tani merret me raste individuale edhe kolektive që ta luftojë Ushtrinë Çlirimtare të Kosovës”, ka thënë ish-ambasadori në Shqipëri.
Sipas Hasanit, parimi i Gjykatës Speciale në Hagë ka qenë etnik dhe hapi i parë i saj është bërë politik dhe diskriminues ndaj shqiptarëve.
“Parimi i saj i parë ka qenë etnik, që nuk kemi gjykata ndërkombëtare etnike, asnjë vend nuk ka gjykata etnike. Gjykatat etnike quhen racizëm, prandaj gjykatat kanë parimin e përgjithshëm mosdiskriminimin, jonacionalitetin dhe të gjithë janë të barabartë para drejtësisë, pavarësisht gjuhës, racës, kombit etj. Kështu që këtu kemi dallimin e kemi vetëm UÇK-në, nuk e kemi Serbinë, as nuk e kemi bashkësinë serbe, policinë, ushtrinë, qytetarët serbë që kanë marrë pjesë në krime, që kanë marrë pjesë në dhunime, masakrime dhe dëbime. Prandaj, kemi vetëm një pjesë dhe pjesën tonë e kemi shqiptarët dhe UÇK-në. Kjo do të thotë që hapi i parë është bërë politik, diskriminues dhe racistë ndaj shqiptarëve në përgjithësi dhe ndaj nesh”, ka thënë Hasani. /teve1.info/
