Nait Hasani, ish ambasador i Kosovës në Shqipëri, tha se problemet politike në veri të Kosovës nuk mund të zgjidhen me arrogancë, por që sipas tij, ato duhet ti zgjidhin faktorët e fuqishëm ndërkombëtarë.
Hasani duke komentuar kërkesën për dorëheqjen e kryetarëve nga komunat veriore dhe mbajtjen e zgjedhjeve të reja atje, tha se kjo e tregon dobësinë politike të qeverisë në këtë rast.
“Problemet politike me arrogancë nuk zgjidhen, ato mun t’i zgjidhin faktorët e fuqishëm ndërkombëtarë, mirëpo në rrethanat që jemi ne nuk mund ti zgjidhim prandaj na u deshtë të kërkohet mbështetje. Lëndimi i numrit aq të madh të KFOR-it nga ato protesta aty, tregon që ka një krim të organizuar të jashtëzakonshëm, po a mund të luftohet ajo në këtë formë është vështirë. E tash kërkesa tjetër për me dhënë dorëheqje për mi mbajtë zgjedhjet prap tregon dobësinë politike, po nëse janë zgjedhë cila është arsyeja me u shkarku, cila është arsyeja nëse une nuk kam qenë përfaqësues i mirë pse më zgjodhe, unë jam zgjedhë ma ke njoftë të drejtën e zgjedhjes, i presim kur të vijnë zgjedhjet”, tha Hasani në emisionin “Ditari” në Tëvë1.
Madje Hasani kritikoi qeverinë pasi sipas tij, nuk mund të shkarkohet një kryetarë komune me një udhëzim administrativ.
“Po mirë pse nuk u koordinu me kushte me shku me ta, tash këtu është ajo pengesa e qeverisë dhe gabimet politike të qeverisë në këtë pikë. Tash do ta gjejmë një arsye do ta bëjmë një udhëzim administrativ, do ta bëjmë një ligj për zgjedhjet dhe do t’i shpallim zgjedhjet për me i mbajtë në katër komuna dhe do t’i mbajmë zgjedhjet. Nuk ka ligjshmëri për me e shkarku kryetarin e komunës me udhëzime administrative dhe me i thirrë qytetarët, hajde dilni se ne dojmë me e shkarku. Nuk ka protesta për me shkarku, ata kanë protesta pse u zgjedh paligjshëm “, shtoi ai.
Ndryshe, tri javë pas marrëveshjes së Bratislavës për deeskalim të situatës në katër komunat veriore të Kosovës, Qeveria Kurti ka nisur edhe zyrtarisht zbatimin e saj.
Të martën edhe formalisht nisën procedurat për largimin e kryetarëve shqiptarë në komunat me shumicë serbe.
Mirëpo, forma që Qeveria Kurti po dëshiron që veriu të shkojë në zgjedhje të reja, po del në kundërshtim me kërkesat amerikane dhe evropiane.
Ata po kërkojnë që kryetarët aktual të japin dorëheqje, derisa nga ekzekutivi po duan që kjo të bëhet përmes peticionit nga serbët lokalë./teve1.info./
Nis procedura për zgjedhje të reja në veri, nuk ka pajtim për formën
