I mbijetuari i masakrës së Burgut të Dubravës, Nait Hasani, ka deklaruar se drejtësia për këtë ngjarje tragjike është lënë pas dore dhe nuk është trajtuar siç duhet nga institucionet.
Ai i bëri këto komente gjatë homazheve në burgun e Dubravës, me rastin e 27-vjetorit të masakrës, duke theksuar se pavarësisht premtimeve të përsëritura ndër vite, nuk ka pasur hapa konkretë nga drejtësia apo institucionet shtetërore.
“Shoqëria jonë nuk ka bërë mjaftueshëm për këtë masakër dhe për këtë burg, sepse nuk është trajtuar siç duhet. Nuk është marrë sa duhet nga gjykata, prokuroria dhe institucionet.Kemi ngritur zërin çdo vit dhe e kemi përjetuar këtë gjendje çdo vit. Kemi thënë se këtë vit do të bëjmë diçka, por çdo vit ka mbetur në heshtje nga institucionet e shtetit, nga drejtësia, Kuvendi, Qeveria dhe Presidenca. Dhe kur vjen puna për zgjedhje, sërish na kujtohet kjo çështje”, ka deklaruar ai./teve1.info/
