Kryetari i Aleancës për Ardhmërinë e Kosovës, Ramush Haradinaj ka thënë se për Kosovën raportet e mira me aleatët me theks ato me SHBA-në janë jetike për anëtarësimin në NATO.
Ai këto komentet i ka bërë përmes një postimi në Facebook, ku ka njoftuar për një takim që ka zhvilluar më përkrahës të AAK-së më mërgimtarët në Zvicër.
“Liria e që e gëzojmë sot, ka rrënjët tek përpjekjet dhe sakrifica e shumë brezave, e cila kulmoi me luftën e lavdishme të Ushtrisë Çlirimtare. Por, kjo liri është edhe falë aleatëve tanë në krye me ShBA-të, të cilët i kanë dhënë krah Kosovës në kohërat më të rënda. Për Aleancën, marrëdhëniet me miqtë tanë e me ShBA-të në veçanti, janë jetike për rrugën tonë drejt anëtarësimit në NATO dhe në proceset e tjera euro integruese”, ka shkruar Haradinaj.
Haradinaj ka thënë se Zvicra ka qenë strehë për shumë shqiptarë në kohërat më të vështira dhe edhe sot vazhdon të jetë shtet mik dhe përkrahëse e Kosovës.
“Zvicra si vend mik i yni, ka qenë strehë për shumë shqiptarë në kohërat më të vështira, ka qenë pranë nesh në periudhën shtet-formuese e vazhdon ta ndihmojë Kosovën edhe tash në forma të ndryshme. Sot, shqiptarët në Zvicër janë vlerë e çmuar dhe e respektuar për shoqërinë. Me vlerat që i përfaqësojnë, përkushtimin dhe suksesin e treguar, janë shembull edhe për të tjerët”,ka shkruar ai./teve1.info/