Sipas Haradinaj, bllokimi i ligjit të pagave nga Kurti, është vjedhje ndaj disa kategorive.
“Kam qenë ndër të rrallët në mos i vetmi që kam folur hapur se Kosova kishte nevojë për rotacion të pushtetit. Kam besuar se Albin Kurti dhe Vetëvendosje do të ishin zgjidhje e duhur, por sot jam i zgjënjyer deri në palcë me qeverisjen e tyre!Po si nuk e kryen një punë të hajrit për një vit e sa që janë në qeveri!?Si e bllokuan ligjin e pagave, që nuk është tjetër pos hajni ordinere ndaj mjekëve, mësuesve, policëve, ushtarëve, punëtorëve…”, shkruhet në postimin e Haradinaj.
Gjithashtu, Haradinaj ka thënë se me ligjin e ri të pagave të miratuar nga qeveria që ai drejtonte, e të cilin thotë se e ka bllokuar kryeministri i vendit Albin Kurti, një mjek specialist do të duhej ta kishte pagën bazë 1200 euro.
“Sot e ka 703 euro. Kjo i bjen që Qeveria Kurti, e ka dëmtuar secilin prej tyre nga 6045 euro për vit. Natyrisht pa e kalkuluar inflacionin vjetor prej 14.1 %, i cili do të duhej të ishte harmonizuar me rritjen vjetore të pagave. Ngjashëm është edhe më të gjitha kategoritë tjera të të punësuarve, një numër jo i vogël i të cilëve tashmë e kanë marrë rrugën e mërgimit”, thuhet tutje.
Sipas tij, nuk ka asnjë shpjegim logjik se pse kjo qeveri nuk ka ndërmarrë asnjë veprim për mbajtjen “sado kudo nën kontroll, të rritjes enorme të çmimeve”.
“Qeverisë i janë rritur të hyrat, por u janë zvogëluar qytetarëve. Nga punët e Qeverisë Kurti, kanë mbetur vetëm deklaratat qesharake të eksponentëve të saj, se “pagat në Kosovë janë rritur më shumë se sa çmimet”. Kam dashur shumë që kjo qeveri të ketë sukses, por ajo sot është shndërruar në qeverinë më antipopullore që ka pasur Kosova ndonjëherë”, ka shtuar Haradinaj.
