Kryetari i Aleancës për Ardhmërinë e Kosovës, Ramush Haradinaj, të enjten ka pritur në takim shefin e ri të OSBE-së në Kosovë, Gerard McGurk.
Tëmë diskutimi sipas Haradinajt ka qenë nxitja e institucioneve të Kosovës në avancimin e demokracisë, promovimin e të drejtave të njeriut dhe sundimin e ligjit.
Haradinaj ka theksuar se ambasadorit McGurk i ka kërkuar mbështetjen e tij për Kosovën, si dhe i ka ofruar bashkëpunimin e Aleancës me misionin që ai drejton.
“Misioni i OSBE-së në Kosovë në vazhdimësi ka nxitur dhe mbështetur institucionet e vendit në avancimin e demokracisë, promovimin e të drejtave të njeriut dhe sundimin e ligjit. Në këtë frymë, ishte edhe bashkëbisedimi jonë sot, me ç’rast Ambasadorit McGurk i kërkova mbështetjen e tij për vendin tonë, e po ashtu e sigurova edhe për bashkëpunimin tim dhe të Aleancës me misionin që ai e drejton”, ka shkruar ai në Facebook.
Ambasadori, Gerard McGurk, diplomat karriere në Shërbimin Diplomatik Britanik, më 5 maj të këtij viti është emëruar dhe ka marrë zyrtarisht detyrën e re si Shef i Misionit të OSBE-së në Kosovë.
