Kryetari i Aleancës për Ardhmërinë e Kosovës, Ramush Haradinaj, thotë se është i tronditur nga vrasja e policit dhe plagosja e tjetrit që ka ndodhur në mëngjesin e sotëm në fshatin Banjska të Leposaviqit.
Haradinaj thotë se ky “sulm terrorist” është goditje e rëndë mbi paqen dhe stabilitetin jo vetëm në Kosovë, por edhe në rajon.
“Beogradi duhet që urgjentisht të heqë dorë nga veprimet e veta destabilizuese e luftënxitëse me pasoja të paparashikueshme jo vetëm për Kosovën por edhe për Serbinë. Është investuar shumë për paqen dhe askush nuk do të lejohet ta rrezikojë atë”, ka shkruar Haradinaj në Facebook.
Tutje, ai ka ftuar organet për bashkërendim të veprimeve me KFOR dhe aleatët nga Amerika, që të ndërmarrin të gjitha veprimet për të zbardhur këtë situatë.
“Ftoj organet tona të rendit për bashkërendim të veprimeve me KFOR dhe aleatët tanë të sigurisë të prirë nga Amerika, dhe të ndërmarrin të gjitha veprimet e nevojshme për ta zbardhur gjithë këtë situatë dhe për të sjellë para drejtësisë përgjegjësit e këtij akti. Rendi dhe ligji s’ka alternativë!”, ka shkruar ai tutje.
Përfund, Haradinaj ka ngushëlluar familjen e policit të vrarë, dhe i ka uruar shërim të shpejtë të plagosurve. /teve1.info/
