Kryetari i Aleancës për Ardhmërinë e Kosovës (AAK), Ramush Haradinaj, ka reaguar pas ngjarjes tragjike në Gjakovë, ku dy punëtorë humbën jetën në vendin e punës. Ai ka shprehur ngushëllimet e tij dhe ka kërkuar më shumë siguri dhe përgjegjësi institucionale për mbrojtjen e jetës së punëtorëve.
“I trishtë lajmi për ndarjen tragjike nga jeta të dy punëtorëve në vendin e punës në Gjakovë. Humbja e jetës në përpjekje për të siguruar bukën e gojës është një tragjedi e madhe për familjet, por edhe për gjithë shoqërinë tonë,” ka shkruar Haradinaj në rrjetet sociale.
Ai ka apeluar ndaj bizneseve dhe institucioneve shtetërore, duke kërkuar rritjen e masave të sigurisë dhe zbatimin e ligjeve për mbrojtjen e punëtorëve.
“Lus ndërmarrësit kosovarë që të rrisin nivelin e sigurisë fizike të punëtorëve në çdo vend pune. Për organet shtetërore, ky rast duhet të shërbejë si alarm për të rritur përgjegjësinë institucionale dhe për të garantuar zbatimin e plotë të ligjeve që mbrojnë punëtorin,” theksoi Haradinaj.
Në fund të reagimit të tij, lideri i AAK-së ka shprehur dhimbjen dhe solidaritetin me familjet e viktimave, kolegët e tyre dhe qytetarët e Gjakovës.
