Kryetari i Aleancës për Ardhmërinë e Kosovës, Ramush Haradinaj pret që draft-statutin për Asociacionin ta hartojnë Shtetet e Bashkuara të Amerikës.
Ai pas refuzimit që i bërë kryeministri Kurti draft-statutit të prezantuar nga Ekipi Menaxhues i përbërë nga serbët, që sipas Kurtit ishte në kundërshtim me Kushtetutën e Kosovës, thotë se shpreson që një statut të bëhet nga amerikanët që është në përputhje me ligjet dhe Kushtetutën e Kosovës.
“Besoj shumë që tash zgjidhja është te amerikanët edhe te BE-ja që ata vet pra të marrin ndërmjetësimin, të propozojnë një draft statut që është në përputhje me Kushtetutën. Unë shpresoj shumë, sidomos te amerikanët që ata do ta marrin përsipër propozimin e një draft- statuti që është në përputhje me Kushtetutën dhe ligjet e Kosovës. Nuk ka epilog tjetër, nuk mund të dalim prej Kushtetutës dhe prej ligjeve”, ka thënë Haradinaj të enjten për media, raporton Tëvë 1.
I pyetur nëse ka ndonjë informacion se mundë të ndodhë një gjë e tillë apo vetëm shpreson, ai tha se rrjedhja logjike është kjo.
“Tani rrjedha e logjikshme është kjo, unë jo se kam ndonjë informacion por rrjedha e logjikshme është se kur dy palët nuk e gjejnë mesin rasti konkret pra, unë besoj që edhe e kanë shkruar amerikanët e evropianët një draft- statut. Besoj po, që është në përputhje me Kushtetutën”, tha tutje ish-kryeministri.
Haradinaj tha se ka qenë e palogjikshme si është vendosur që draft-statuti të shkruhet nga serbët dhe vlerësimi të jepet nga Gjykata Kushtetuese e Kosovës. Ai tha se ka qenë e pritshme që Ekipi Menaxhues do të propozonte diçka që është në kundërshtim me Kushtetutën e Kosovës.
Kryetari i Kuvendit të Kosovës, Glauk Konjufca të mërkurën tha se nuk do të pranojnë asnjë llojë zgjidhje që është në kundërshtim me Kushtetutën e Kosovës./teve1.info/
