Analistja politike Shqipe Pantina ka komentuar mungesën e një ftese nga kryeministri Albin Kurti për kreun e AAK-së, Ramush Haradinaj, në takimet konsultative për çështjen e presidentit.
E ftuar në emisionin “Këndi i debatit” në Tëvë1, Pantina tha se në politikë, kur ekziston interesi, palët i lënë anash akuzat dhe arrijnë marrëveshje, por sipas saj, në këtë rast Kurti nuk e ka parë të arsyeshme një bashkëpunim me AAK-në.
“Në politikë, nëse ka interes, i harrojnë akuzat, i harrojnë gjuhët ndaj njëri-tjetrit dhe ulen e merren vesh. Por kësaj here Kurti nuk e ka parë interesin prej gjashtë votave të Haradinajt, sepse nuk ka çfarë t’i japë në këmbim për ato vota. Kandidimin për president nuk mund t’ia japë për gjashtë vota”, ka deklaruar Pantina.
Sipas saj, edhe në aspektin numerik, votat e AAK-së nuk janë vendimtare për procesin.
“Nëse i shikon numrat, me AAK-në as nuk i prish punë dhe as nuk i kryen punë fare”, u shpreh ajo.
