Kryetari i Aleancës për Ardhmërinë e Kosovës, Ramush Haradinaj, ka deklaruar se plani aksional për anëtarësim në NATO mbetet objektivi strategjik i Kosovës, si perspektiva e vetme për të siguruar paqe dhe siguri afatgjate për Kosovën dhe rajonin.
Haradinaj këtë deklaratë e ka bërë pas takimit që ka zhvilluar të premten me ambasadorin amerikan në Kosovë, Jeffrey Hovenier, me të cilin ka thënë se kanë biseduar për përpjekjet e Kosovës për anëtarësim në NATO.
“Në Ambasadën Amerikane, pata nderin të zhvilloja një diskutim të hapur dhe miqësor me ambasadorin Jeffrey Hovenier. Biseduam mbi zhvillimet politike dhe ato të sigurisë në vend, me fokus të veçantë në përpjekjet tona për anëtarësim direkt në NATO. E sigurova ambasadorin Hovenier se do të angazhohemi që aktivitetet tona politike të jenë të përqendruara në këtë synim të përbashkët. I shpreha mirënjohjen time të thellë ambasadorit Hovenier për mbështetjen e tij dhe të Shteteve të Bashkuara të Amerikës ndaj Kosovës, duke qëndruar pranë nesh në çdo hap.Plani aksional për anëtarësim në NATO (Membership Action Plan) mbetet objektivi ynë strategjik, si perspektiva e vetme për të siguruar paqe dhe siguri afatgjatë për vendin dhe rajonin tonë”, ka shkruar ai në Facebook./teve1.info/
