Kryetari i Aleancës për Ardhmërinë e Kosovës, Ramush Haradinaj, ka përgëzuar organet e rendit për zbardhjen e dy vrasjeve në Prishtinë dhe atë të grabitjes në një argjendari në Suharekë.
Ai ka thënë se këto veprime e nderojnë Kosovën
“Sukseset e organeve të rendit në zbardhjen e rasteve kriminale, sikurse rasti i grabitjes së argjendarisë në Suharekë, vrasja e vjehrrit nga dhëndëri i tij e së fundi rasti i vrasjes së Liridona Murselit, e nderojnë Kosovën dhe rrisin kredibilitetin tek institucionet tona të sigurisë. Falënderues ndaj Policisë së Kosovës, hetuesve dhe Prokurorisë për zbardhjen e shpejtë të këtyre akteve kriminale”, ka shkruar Haradinaj.
Ai ka thënë se në këto “momente të rënda, bashkëndjejmë me familjet që humbën të afërmit e tyre. Lutemi shumë që të tilla raste mos të ndodhin më asnjëherë”.
Prokuroria Themelore në Prishtinë, ka konfirmuar se për rastin e vrasjes së një gruaje (Liridona Murseli), në Prishtinë është arrestuar vrasësi G.P dhe Naim Murseli bashkëshorti i Liridonës.
Sipas Prokurorisë në koordinim me Policinë e Kosovës në aksionin ku janë arrestuar dy personat është sekuestruar edhe një armë, e cila dyshohet se është përdorur në këtë rast./teve1.info/
