Kryetari i Aleancës për Ardhmërinë e Kosovës, Ramush Haradinaj, tha se Kosova tanimë është dobësuar përballë të gjithëve, madje përfshiu edhe Serbinë.
Derisa ritheksoi që tani është muaji i katërt që policët e Kosovës nuk marrin shtesa për rrezikshmëri në punë, Haradinaj pyeti partitë opozitare në Kuvend se cili është problemi i tyre që ende kanë hezitime për votimin e mocionit të mosbesimit, shkruan teve1.info.
“Jemi duke u sjellë me tallje ndaj asaj që na kanë besuar njerëzit dhe ndaj të gjithë brezave që me mund e ka sjellë vendin këtu ku është sot. Nëse kanë filluar ndëshkimet dhe kemi humbur besimin, a forcohet Kosova përballë bandave në veri e përball bandave në Serbi?, Kosova është dobësuar përballë të gjithëve. Jemi bërë objekt tallje, jemi bërë objekt tallje që s’kanë rrezikshmëri ende policët e Kosovës, që 4 muaj nuk e kanë marrë rrezikshmërinë. Pse ka hezitime për mocion? Ku është problemi te ata që po hezitojnë për mocion? Ku e keni problemin kolegë opozitar PDK dhe LDK që po mendoni ende se kush përfiton nga mocioni?”, deklaroi Haradinaj gjatë seancës plenare në Kuvend.
Madje kreu i AAK-së, vlerësoi që tanimë i ka humbur vlera Parlamentit, pasi siç tha ai, të gjithë po sillen sikur s’ka ndodhur asgjë./teve1.info/.
