Kryetari i AAK-së, Ramush Haradinaj ka thënë se Kosova është duke kaluar momente të vështira për shkak të kryeneçësisë së kryeministrit, Albin Kurti.
Ai tha se është momenti i fundit që Kurti të heqë dorë nga kursi i mosveprimeve dhe të koordinohet me aleatët e Kosovës.
“Kosova po kalon momente të vështira, për shkak të kryeneçësisë së Kryeministrit dhe pavendosmërisë së Presidentes! Kosova po kalon momente vendimtare e as ata e as ndjekësit e tyre, nuk janë duke e kuptuar rrezikun që paraqet izolimi nga aleatët perëndimorë dhe veprimet që janë përmbysje e gjithë asaj që është arritur deri më sot.
Hezitimi që të pranohen sugjerimet e partnerëve tanë strategjikë, posaçërisht ShBA-së, në një situatë kaq vendimtare, mund të kenë pasoja të rënda për vendin. Kryeministri e ka momentin e fundit të heqë dorë nga kursi i mosveprimit e të kalojë në anën e duhur. Vetëm kështu, e të koordinuar me Amerikën dhe BE-në, fitohet beteja e finale me Serbinë”.
Ai tha se kjo është thirrja e fundit që kryeministri dhe presidentja të rreshtohen me aleatët dhe ta mbyllim njëherë e përgjithmonë marrëveshjen me njohje reciproke me Serbinë.
“Mos e përjashtoni veten nga ky proces”, ka përfunduar ai.
