Kryetari i Aleancës për Ardhmërinë e Kosovës, Ramush Haradinaj dhe kandidati për kryetar të Prishtinës, Bekë Berisha, të dielën në Mramor të Prishtinës, kanë ndarë idetë e tyre për shndërrimin e Prishtinëns në qendër të zhvillimit dhe atraksionit në rajon.
Haradinaj, ka thënë se mbështetja e qytetarëve të kryeqytetit për kandidatin për kryetar, Bekë Berisha, dhe për listën e Aleancës, po rritet çdo ditë.
Ai përmes një postimi në Facebook ka thënë se kjo rritje po bëhet falë faktit se “Beka, si një njeri i përkushtuar dhe i afërt me qytetarët, ofron një vizion qeverisës që në prioritet ka nevojat e secilit qytetar të Prishtinës”.
“Ky vizion është i ndërtuar mbi problemet konkrete të çdo rruge e lagjeje, dhe programi ynë për Prishtinën buron pikërisht nga këto nevoja. Sot, në Mramor të Prishtinës, ndamë idetë tona për ta rikthyer Dritën në kryeqytet, për ta bërë Prishtinën qendër të zhvillimit dhe atraksionit në rajon. Prishtina është qytet me natyrë të pasur e gjelbërim, që duhet ta shfrytëzojmë duke inkurajuar turizmin malor dhe rekreacionin, për ta kthyer kryeqytetin në destinacion modern e tërheqës”, ka shkruar ai.
Haradinaj ka thënë se problemet bazike nuk janë problem pasi sipas tij, ato janë punë të kryera në programin e Berishës.
