Kryetari i AAK-së, Ramush Haradinaj, ka përkujtuar ngjarjet e 3 majit 1999, kur forcat serbe ndalën kolonën e civilëve nga fshatrat Vraniq, Bukosh, Savrovë dhe Sopijë, të cilët po dëboheshin me dhunë drejt Shqipërisë.
Sipas tij, nga kjo kolonë u ndanë me forcë 35 civilë – burra, gra dhe fëmijë – të cilët më pas u masakruan në oborrin e shkollës në Bukosh, pa u kursyer as më të miturit e as të moshuarit.
Përmes një postimi në Facebook, Haradinaj theksoi se familje të tëra sakrifikuan jetën për lirinë e Kosovës.
Ai shtoi se kjo sakrificë mbetet një kujtesë e fortë për obligimin që të vazhdohet kërkimi i drejtësisë dhe ndëshkimi i të gjithë atyre që urdhëruan dhe kryen krime ndaj popullit shqiptar.
