Kryetari i AAK-së, Ramush Haradinaj, ka thënë se sulmi terrorist i 24 shtatorit nga grupi i armatosur serb, e ka shndërruar Kosovën në problem të sigurisë ndërkombëtare.
Haradinaj në një postim në Facebook, ku ka njoftuar se ka zhvilluar një takim me qytetarë në Klinë, ka thënë se duhet të ndalet dëmtimi i progresit të arritur për më shumë se 20 vjet.
“Ngjarjet në veri e kanë shndërruar Kosovën në problem të sigurisë ndërkombëtare. Sot, jemi në një situatë ku shtetet aleate si Gjermania e Mbretëria e Bashkuar janë detyruar t’i rikthejnë trupat e tyre në kuadër të KFOR, e kjo nuk është e lehtë për ta. Është koha të mos lejojmë të dëmtohet progresi që e kemi arritur për këto 20 e sa vjet. Shkaktimi i krizave që destabilizojnë rendin e sigurinë në rajon, cenon mundësinë për zhvillim të gjithëmbarshëm dhe realizimin e aspiratës sonë për integrimin në BE dhe në NATO”, ka shkruar Haradinaj./ teve1.info/
