Kryetari i AAK-së Ramush Haradinaj, ka komentuar deklaratën e ministres së Punëve të Jashtme, Donika Gërvallës për “gjeneral të vetëshpallur”.
Haradinaj u shpreh për KP se gradën e dytë e ka nga NATO, e nga një oficer gjerman, pikërisht “ku ka lindur kjo zonja”.
“Ua kam hequr maskat edhe tash po iu prishën matematikat, po shohin se nuk e kanë punën mirë. Kuptohet, janë bërë nervoz, por detyra ime është kjo, unë jam opozitarë, ka qenë detyra ime me iu hequr maskat – me ia qit ashtu si janë dhe po e shihni se çfarë janë. Hero janë dëshmorët e ata, për gjeneral, gradën e dytë e kam pikërisht prej NATO-s dhe atë prej një oficeri gjerman, atje ku është rritur kjo zonja, gjeneralit Klaus, ma ka dhënë me dorën e vet”, tha Haradinaj.
Edhe Organizata e Veteranëve të Luftës së UÇK-së ka reaguar lidhur me deklaratat e ministres së Jashtme, Donika Gërvalla, duke i bërë thirrje që të ndalojnë me fyerje e veprime keqdashëse kundër luftës së lavdishme çlirimtare dhe pjesëtarëve të UÇK-së, “sepse një ditë, jo të largët, vet populli do t’u pështyjë surratin e do t’u hedh në kosha plehrash”.
Gërvalla mbrëmë gjatë një tubimi në Deçan, tha se Kosova në NATO nuk hyn as me gjeneralë të vetëshpallur e as me katër milionë euro buxhet në vit për ushtri siç ishte më parë.
