Kandidati i Aleancës për Ardhmërinë e Kosovës për postin e kryeministrit, Ramush Haradinaj, ka rikujtuar qasjen e tij ndaj sektorit energjetik gjatë mandateve qeverisëse, duke theksuar se energjia elektrike ishte trajtuar si çështje strategjike për shtetin.
Përmes një postimi në Facebook, ai ka theksuar se në kohën e qeverisjes së tij, siguria energjetike kishte qenë prioritet i drejtpërdrejtë institucional.
Haradinaj ka vlerësuar se gjatë asaj periudhe, furnizimi me energji mbështetej kryesisht në prodhimin vendor, gjë që, sipas tij, ndikoi në çmime më të përballueshme për qytetarët dhe varësi më të vogël nga importet.
Ai ka përmendur edhe forcimin e menaxhimit në sektor, ruajtjen e rolit strategjik të KEK-ut dhe stabilizimin e prodhimit nga termocentralet ekzistuese.
“Gjatë asaj qeverisjeje: -Çmimet për qytetarët ishin më të përballueshme, sepse energjia prodhohej brenda vendit, jo e varur nga importet e shtrenjta -U vendos drejtim i qartë për siguri energjetike dhe prodhim vendor -U ndal degradimi institucional i sektorit dhe u rikthye serioziteti në menaxhim -KEK-u u trajtua si aset strategjik shtetëror, jo si ndërmarrje për eksperimente politike- -Prodhimi vendor nga Kosova A dhe Kosova B mbulonte pjesën dërrmuese të konsumit -Importi i energjisë ishte dukshëm më i ulët krahasuar me vitet e mëvonshme -U licencuan dhe u mbështetën projekte në energji diellore dhe të erës, duke diversifikuar burimet e prodhimit”, ka thënë ai teksa ka shtuar se janë marrë edhe veprime për të ardhmen: “-U hap rruga për kapacitete të reja prodhuese, si bazë afatgjatë e sigurisë energjetike të Kosovës -Filloi implementimi i projektit për ndërtimin e termocentralit të ri “Kosova C”, si nevojë strategjike për stabilitet energjetik -U trajtua seriozisht projekti i gazit amerikan, si alternativë moderne dhe më e pastër për furnizim energjetik -U planifikua ndërtimi i termocentralit të ri me thëngjill, mbi parime të sigurisë dhe pavarësisë energjetike”, ka shkruar ai në Facebook.
