Kryetari i Aleancës për Ardhmërinë e Kosovës (AAK), Ramush Haradinaj, ka deklaruar se dita e djeshme ka konfirmuar fuqinë politike dhe stabilitetin e këtij subjekti, duke e vlerësuar si një rezultat të madh dhe një dëshmi të modelit të suksesshëm të qeverisjes që sjell ndryshime reale dhe pozitive për qytetarët.
Në një postim në Facebook, Haradinaj ka falënderuar të gjitha institucionet për organizimin e zgjedhjeve me standarde të larta demokratike dhe ka shprehur mirënjohje për aktivistët dhe strukturat e AAK-së, veçanërisht për ata në Diasporë, të cilët u angazhuan me përkushtim.
“Dita e djeshme konfirmoi fuqinë politike dhe stabilitetin e Aleancës. Kemi triumfuar në 5 komunat ku kemi qeverisur, dhe do të jemi në bashkëqeverisje në mbi 10 komuna. Në kuvendet komunale, Aleanca përfaqësohet me 98 asambleistë”, ka shkruar Haradinaj.
Ai gjithashtu falënderoi qytetarët që mbështetën AAK-në, duke theksuar se ky rezultat është një konfirmim i qartë se modeli i qeverisjes së Aleancës sjell përmirësime të prekshme për qytetarët.
“Për 87.358 qytetarët që na besuan dhe mbështetën projektin tonë politik, ju siguroj se do të punojmë edhe më shumë për t’u shërbyer atyre dhe do të vazhdojmë të avancojmë dhe reformohemi për zgjedhjet e ardhshme”, shtoi ai.
Haradinaj gjithashtu shprehu falënderime për kryetarët e komunave që udhëhoqën AAK-në dhe që ishin pjesë e suksesit, duke përmendur Ardian Gjinin në Gjakovë, Bali Muharremajn në Suharekë, Bashkim Ramosajn në Deçan, Smajl Latifin në Rahovec dhe Zenun Elezaj në Klinë.
“Ju treguat se jeni vlera e vazhdimësisë së transformimit të komunave që qeverisni, me punë konkrete dhe qeverisje të përgjegjshme për çdo qytetar,” përfundoi ai.
