Ish-ministrja e Jashtme e Kosovës, Meliza Haradinaj, vlerësoi që Bashkimi Evropian, nuk e ka aspak të qartë se si do të arrijnë deri te marrëveshja përfundimtare mes Kosovës dhe Serbisë.
Ndërsa, sa i përket marrëveshjes së dakorduar në Bruksel, Haradinaj pikën më shqetësuese e konsideroi çështjen e Kishës Ortodokse Serbe, derisa shtoi që kjo është pjesë e brendshme e Kosovës.
“Unë e shoh që Bashkimi Evropian si fasilitues i kësaj marrëveshje, apo këtij dialogu, nuk e ka të qartë as çka dëshiron të arrijë, e as si do të arrijë deri te marrëveshja finale. Ndërsa pika më shqetësuese, është edhe çështja e Kishës Ortodokse. Nuk ka marrëveshje në dialogun e Brukselit për Kishën Ortodokse, kjo është çështje e brendshme e Kosovës, është çështje e dialogut të Qeverisë së Kosovës. Pika e 6 e marrëveshjes më është dukur ofendim. Pasi çështja e të pagjeturve trajtohet së bashku me sportin, energjinë, telekomunikimin, do të thotë është një shpërfillje totale dhe e pa përgjegjshme. Qeveria Kurti ka vazhduar linjën e njëjtë si ajo e qeverive të kaluara në dialog”, deklaroi Haradinaj në emisionin “Info Nata”.
Madje, Haradinaj tha se kryeministri Albin Kurti, është lideri i vetëm që ka pasur ide të qarta se si të veprohet në dialog, mirëpo sipas saj, Kurti nuk e ka bërë një gjë të tillë.
“Prandaj, së paku në këtë pikë është pritur që Kurti të ketë një qasje tërësisht tjetër, të redifinojë dialogun, të redifinojë parimet, të redifinojë qartë epilogun deri te marrëveshja finale, gjë që nuk e kemi parë”, theksoi më tej ajo në Tëvë1.
Ndërkaq, lidhur me çështjen e Asociacionit, Haradinaj tha se në këtë pikë nuk e fajëson aspak kryeministrin Kurti.
“Asociacioni është trashëguar nga ish qeveritë e kaluara”./teve1.info/.
